Bugun Birlashgan Arab Amirliklarining (BAA) Dubay shahrida 5.8 mln. AQSh dollari (21.3 mln. BAA dirhami) va "Jaguar” avtomobilini o’g'irlashda ayblanayotgan to’rt kishi ustidan birinchi instansiya sudi boshlandi. Aybdorlardan biri o’zbekistonlik 30 yoshli erkak.

Gulfnews.comning yozishicha, to’rt ayblanuvchining uch nafari – ikki rossiyalik va bir o’zbekistonlik – o’z aybini bo’yniga olgan. Ammo ular o’g'irlik paytida qurol ishlatganlik haqidagi ayblovni rad etmoqda.

Qoralovchilar e’lon qilgan ayblovga ko’ra, uch rossiyalik va bir o’zbekistonlikdan iborat xorijlik fuqarolar guruhi pichoqlar bilan qurollangan holda uyushgan jinoiy to’da tuzib, katta miqdordagi pulni o’g'irlash maqsadida ikki nafar daniyalik biznesmenga hujum qilgan. Ular pichoq va qo’llari bilan 45 va 26 yoshli ikki Daniya fuqarosiga jarohat yetkazib, ularning qo’lidagi pul solingan qoplarni tortib olgan. So’ng ular o’g'irlangan "Jaguar” mashinasida voqea joyidan g’oyib bo’lishgan. O’g'irlangan mashina avstraliyalikka tegishli ekani aniqlandi.

To’rtinchi ayblanuvchi – 38 yoshli rossiyalik – jinoyatdagi ishtirokini butunlay rad etmoqda.

Qo’yilgan ayblovda yozilishicha, ayblanuvchilar daniyalik biznesmenlar yashovchi uy oldiga o’g'irlangan mashinada kelishgan. Ikki Daniya fuqarosi tashqariga chiqishi bilan, ayblanuvchilar mashinadan otilib chiqib, pichoq bilan hujum qilishni boshlagan va pul solingan to’rt qopni jabrlanuvchilarning qo’llaridan tortib olgan. Qoplar ichida 5.8 mln. AQSh dollari miqdorida pul, jabrlanuvchilardan birining laptopi va pasporti bo’lgan.

Jabrlanuvchilarning sudda aytishicha, ular bu pulni ikkita pul ayriboshlab markazidan olgan va ular o’sha kuni o’z vatanlariga uchib ketishi kerak edi. Ular Dubayga biznes maqsadi bilan tashrif buyurganlarini aytmoqda.

Jinoyat izidan tushgan politsiyachilar o’zbekistonlik ayblanuvchini  "Jumeirah Walk”da "Bentley” avtomobilini haydab ketayotgan paytda qo’lga olishgan. Qolgan ayblanuvchilar maxfiy amaliyot natijasida qo’lga tushurilgan.

Sud hujjatlarining ko’rsatishicha, jinoyatda yana bir o’zbekistonlik ayolning ham qo’li bor. U o’g'irlangan pulni o’zi yashayotgan uy shipiga yashirish yo’li bilan jinoyatning amalga oshishiga yordam bergan.

Qoralovchilar suddan ayblanuvchilarga qattiq jazo berilishini talab etmoqda.